Blue Lagoon psoriasismeðferðin er einstök náttúrleg meðferð sem byggir fyrst og fremst á böðun í Blue Lagoon jarðsjó sem þekktur er fyrir lækningamátt og virk efni: steinefni, kísil og þörunga. Einstakt náttúrlegt umhverfi, ferskt loft, hreint vatn og Blue Lagoon húðvörur eru einnig mikilvægir þættir meðferðarinnar. Gestir eru hvattir til að slaka vel á og njóta þess að baða sig í hlýjum jarðsjónum og stuðla þannig að auknu jafnvægi líkama og sálar.

Hvernig kemst ég í meðferð?
Nauðsynlegt er að fá tilvísun frá lækni til að komast í meðferð hjá Bláa Lóninu. Húðlæknar á höfuðborgarsvæðinu og heimilislæknar utan þess geta vísað í meðferð (Tilvísunarform fyrir lækna). Heilbrigðisyfirvöld greiða meðferðarkostnað innlendra meðferðargesta.

Um meðferðina
Húðlæknar lækningalindarinnar skoða meðferðargesti með reglulegu millibili og meta árangur meðferðarinnar. Hjúkrunarfræðingar fylgjast með daglegu ferli og eru meðferðargestum til stuðnings og ráðgjafar. Gestir hefja meðferðardaginn á hressandi steypibaði þar sem þeir nota Blue Lagoon sturtugel, sem inniheldur steinefni og þörunga. Gestir baða sig síðan í 38-41°C heitum jarðsjó í lóni sem er eingöngu ætlað meðferðargestum. Gestum er ráðlagt að baða sig í 60 mínútur í senn, þá nær húðin að hitna vel, blóðstreymið út í hana eykst og gerir húðina móttækilegri fyrir virkum efnum jarðsjávarins. Steinefnin róa húðina og koma á hana jafnvægi, kísillinn hreinsar og þörungarnir næra húðina og mýkja. Dvalargestir baða sig tvisvar sinnum á dag í eina klukkustund í senn og aðrir gestir einu sinni á dag í eina klukkustund.

Einn af kostum Blue Lagoon psoriasismeðferðarinnar í samanburði við loftslagsmeðferðir er að hún krefst ekki langrar útiveru og nálægðar við sólarljós og því er minni hætta á húðkrabbameini og ótímabærri öldrun húðarinnar.

Blue Lagoon kísill gegnir mikilvægu hlutverki í meðferðinni, en hann er eitt af þekktustu og mest einkennandi efnum jarðsjávarins. Þegar húðin er orðin vel móttækileg bera meðferðargestir kísilinn á psoriasisblettina. Kísillinn hreinsar, losar dauðar húðfrumur, örvar blóðflæði og húðin verður mýkri og fær sléttara yfirbragð. Að böðun lokinni fara gestir í steypibað og bera á húðina Blue Lagoon rakakrem og næringarkrem sem innihalda einstaka blöndu af steinefnum.

Auk böðunar í jarðsjónum er boðið upp á UVB ljósaböð í fullkomnum tölvustýrðum ljósaskáp og sérstök handa- og fótaljós. Ljósagreiða sem hentar vel fyrir þá sem eru með psoriasis í hársverði er einnig til staðar. Flestir meðferðargestir stunda ljósaböð samhliða böðun í Blue Lagoon jarðsjó.

Sjá árangur

Til að stuðla að hámarksárangri er eindregið mælt með því að gestir stundi léttar líkamsæfingar, drekki mikið vatn, borði ráðlagðan dagskammt af grænmeti og ávöxtum og haldi reykingum og neyslu áfengra drykkja í lágmarki.

Viðurkenndur meðferðarvalkostur í þremur löndum
Auk þess að hafa hlotið viðurkenningu innlendra heilbrigðisyfirvalda hefur Bláa Lónið einnig hlotið viðurkenningu heilbrigðisyfirvalda í Færeyjum og Danmörku og greiða viðkomandi heilbrigðisyfirvöld fyrir Blue Lagoon psoriasis meðferð þarlendra sjúklinga.

Meðferðargestir frá 18 þjóðlöndum
Vinsældir meðferðarinnar hafa aukist mikið á undanförnum árum. Fjöldi meðferða jókst úr 2000 meðferðum árið 1994 í rúmlega 6000 meðferðir árið 2003. Auk þess að njóta vinsælda meðal innlendra meðferðargesta dregur lækningalindin nú að sér meðferðargesti frá ólíkum heimshornum. Gestir okkar koma frá 18 þjóðlöndum bæði nágrönnum okkar í Norður Evrópu sem og fjarlægum löndum eins og Taílandi. Hér má lesa dæmisögu um góðan árangur.

Psoriasis og fjölskyldan
Psoriasis hefur ekki eingöngu áhrif á sjúklinginn sjálfan heldur einnig þá sem standa honum næst. Það er auðveldara fyrir þá sem eru með psoriasis að takast á við meðferðina fái þeir stuðning og skilning frá sínum nánustu. Áhersla er því lögð á fjölskylduvænt umhverfi.

Samstarf SPOEX og Bláa Lónsins
Bláa Lónið hf vinnur í nánu samstarfi við SPOEX sem eru samtök psoriasis og exem sjúklinga á Íslandi. SPOEX er líknarfélag og var stofnað árið 1972. Það starfrækir í dag skrifstofu og göngudeild fyrir fólk með húðsjúkdóma í eigin húsnæði að Bolholti 6 í Reykjavik. Markmið félagsins er fyrst og fremst að gæta réttar sjúklinganna og stuðla að betra og ríkara lífi þeirra með fræðslustarfsemi og kynningu á sjúkdómunum.

Samstarf Bláa Lónsins og SPOEX er báðum aðilum mikilvægt og þann 30. apríl 2004 undirrituðu Grímur Sæmundsen, framkvæmdastjóri Bláa Lónsins og Valgerður Auðunsdóttir, formaður SPOEX, samstarfssamning milli Bláa Lónsins hf og SPOEX. Samstarfssamningurinn felst m.a. í því að fyrirtækið styrkir formann samtakanna til ferðalaga bæði hérna innanlands og erlendis og geti með því eflt samstarf innanlands jafnt sem erlendis. Bláa Lónið færði einnig SPOEX fartölvu að gjöf. Smelltu hér til að fara á heimasíðu SPOEX þar sem má m.a. finna upplýsingar og fróðleik um húðsjúkdóma.

Bláa Lónið - lækningalind
240 Grindavík
Sími 420-8900
Fax 420-8834
Netfang medferd@bluelagoon.is