Bláa Lónið hf var stofnað árið 1992 og er meginmarkmið félagsins að vera í forystu um uppbyggingu heilsu- og ferðaþjónustu á Íslandi. Öll starfsemi félagsins byggir á einstakleika og eiginleikum Blue Lagoon jarðsjávarins sem inniheldur steinefni, kísil og þörunga eða nálægð við jarðsjóinn og einstakt umhverfi hans.

Starfsemi félagsins er á þremur sviðum: rekstur Bláa lónsins, þróun og markaðssetning á Blue Lagoon húðvörum byggðum á virkum efnum Blue Lagoon jarðsjávarins og rekstur heilsulindar þar sem veitt er meðferð við húðsjúkdómnum psoriasis. Hjá fyrirtækinu starfa 90 manns.

Bláa lónið
Heimsókn í Bláa Lónið - heilsulind er fullkomið dekur fyrir líkama og sál. Heilsulindin er vel þekkt víðsvegar um heiminn og hefur meðal annars fengið verðlaun fyrir að vera besta náttúrulega heilsulind heims, einn af tíu ótrúlegustu baðstöðum heims og ein af 25 bestu heilsulindum í heimi.

Það er einstök upplifun að slaka á í hlýju lóninu (37 - 39°C) á meðan virku efni Blue Lagoon jarðsjávarins, steinefni, kísill og þörungar leika um húðina. Steinefnin veita slökun og koma jafnvægi á húðina, þörungarnir næra hana og mýkja og kísillinn hreinsar og gefur húðinni slétta og fallega áferð.

Blue Lagoon húðvörur
Blue Lagoon húðvörurnar eru unnar úr virkum efnum Blue Lagoon jarðsjávarins. Vörurnar komu fyrst á markað árið 1995 og í dag er fjölbreytt úrval húðvara fyrir andlit og líkama fáanlegt.

Blue Lagoon psoriasismeðferð
Fyrirtækið hefur einnig rekið meðferðarstöð frá árinu 1993 fyrir psoriasis og exemsjúklinga. Blue Lagoon psoriasismeðferðin hefur hlotið viðurkenningu íslenskra heilbrigðisyfirvalda og greiðir Tryggingastofnun Ríkisins hlut íslenskra sjúklinga. Meðferðin er einstök náttúruleg meðferð sem byggir fyrst og fremst á böðun í Blue Lagoon jarðsjó sem þekktur er fyrir lækningamátt og virk efni.