Algengar spurningar

 


Hvað er Bláa Lónið?
Bláa Lónið er einstakur jarðsjór sem er að tveimur þriðju hlutum saltvatn og einum þriðja hluta ferskvatn. Jarðsjórinn finnst á allt að 2000 metra dýpi og er leiddur með lögn frá uppsprettunni að heilsulindinni þar sem gestir njóta þess að slaka á í hlýjum jarðsjónum. Jarðsjórinn rennur einnig af sjálfsdáðum um hraunið sem umlykur svæðið og blandast því auðveldlega jarðsjónum sem leiddur er í lögn að heilsulindinni. Jarðsjórinn er ríkur af steinefnum, kísli og þörungum.

Hversu stórt er Bláa Lónið?
Baðstaðurinn er 8.700 m2 og í lóninu eru um 9 milljón lítrar af jarðsjó.

Hvert er hitastig lónsins og hversu ört endurnýjast vatnið í lóninu?
Með því að leiða hluta jarðsjávarins í lögn að Bláa Lóninu er hægt að stjórna hitastigi lónsins og halda því í 37-39°C. Sírennsli er í gegnum lónið og endurnýjast allt vatnið á 40 klukkustundum. Sýni eru tekin reglulega og eru þau ávallt undir viðmiðunarmörkum. Sýni eru tekin í samræmi við reglur Bláfánans og þurfa að uppfylla strangar kröfur hvað varðar vatnsgæði, öryggismál og verndun umhverfisins. Bláa Lónið var fyrsti staðurinn á Íslandi til þess að fá Bláfánann afhentan.

Er hægt að nota bláu armböndin til að kaupa veitingar?
Gestir fá afhend blá armbönd við komu í heilsulind. Auk þess að vera lyklar fyrir skápa í klefum geta gestir notað armböndin sem kreditkort og verslað á innilaugarsvæði. 5.000 króna úttektarheimild fylgir hverju armbandi fyrir fullorðna en upphæðin er greidd við útgönguhlið. Gestir bera ábyrgð á armböndum sínum og glatist armband greiðir viðkomandi gestur sekt að upphæð 5.000 krónur.

Takið þið erlenda mynt?
Já, tekið er við eftirfarandi mynt: USD, GBP, CAD, DKK, NOK, SEK, CHF, JPY, EUR.

Eru öryggisverðir í Bláa lóninu?
Öryggisgæsla í Bláa Lóninu er öflug. Allir starfsmenn baðsvæðis uppfylla kröfur sem gerðar eru til baðvarða og eru æfingar tíðar. Það eru alltaf a.m.k. tveir öryggisverðir á vakt en fleiri þegar gestafjöldi eykst. Einn er uppi í turni þar sem öll öryggistæki eru til staðar en annar öryggisvörður er á gangi á baðsvæðinu.

Er óhætt fyrir barnshafandi konur að fara í lónið?
Hver og einn einstaklingur er á sinni eigin ábyrgð ofan í lóninu. Hitastig lónsins er á bilinu 37-39°C og er barnshafandi konum því ráðlagt að meta líkamlegt ástand sitt áður þær fara ofan í lónið þar sem líkaminn bregst misvel við heitu vatni. Barnshafandi konum er bent á að drekka nóg af vatni á meðan dvalið er í lóninu. Bláa Lónið býður upp á meðgöngunudd sem fer fram á dýnu ofan í lóninu.

Er óhætt að fara með börn í lónið?
Aldurstakmark í Bláa Lónið er tveggja ára. Öll börn 2-8 ára eiga að vera með armkúta í lóninu, sem hægt er að fá lánaða á staðnum. Enginn aðgangseyrir er fyrir börn 13 ára og yngri í Bláa lónið í fylgd með forráðamönnum. Forráðamenn þurfa að vera 16 ára eða eldri og mega að hámarki tveir gestir 2-13 ára vera með hverjum forráðamanni.  Dýpi lónsins er 90-160 cm og því er full ástæða til að hvetja foreldra og forráðafólk að gæta fyllstu varúðar með börn sín.

Er hægt að fá lánaðan hjólastól?
Já, það er hægt að fá lánaðan hjólastól, bæði hefðbundinn stól og sturtustól. Vinsamlegast ráðfærið ykkur við starfsfólk í gestamóttöku við komu.

Geta einstaklingar með hreyfihömlun farið ofan í lónið?
Já, einstaklingar með hreyfihömlun geta farið ofan í lónið. Sérhönnuð skiptiaðstaða með salerni og sturtu er til staðar. Ekki er borgað fyrir aðstoðarfólk einstaklinga með hreyfihömlun í Bláa Lónið. Vinsamlegast hafið samband við starfsfólk í gestamóttöku.

Má nota Blue Lagoon húðvörur fyrir ungbörn?
Mælt er með að nota húðvörur sem eru sérstaklega þróaðar fyrir ungbörn. Hins vegar ætti að vera óhætt að nota allar meðferðarvörur Blue Lagoon húðvara fyrir ungbörn þar sem þær eru allar ofnæmisprófaðar, ilmefna- og litarefnalausar.

Hver er arkitekt Bláa Lónsins?
Sigríður Sigþórsdóttir, Basalt Arkitektar, er aðalhönnuður baðstaðarins.

Hversu margar hraunhellur inniheldur hraunveggurinn í Bláa lóninu?
Stóri hraunveggurinn er einkennandi fyrir Bláa lónið og telur 130.000 hraunhellur.

Hvernig er bað- og búningsaðstaðan?
Búningsaðstaðan rúmar 700 gesti samtímis. Búningsklefarnir eru sex talsins, þrír kvennaklefar og þrír karlaklefar. Á efri hæð baðstaðarins eru tveir kvennaklefar og tveir herraklefar. Speglar og hárblásarar eru til staðar í klefunum. Sérstakir skiptiklefar þar sem gestir geta skipt um föt í einrúmi eru einnig í klefum á efri hæð.